SYSTEM OF RICE INTENSIFICATION-2

System of Rice Intensification (SRI) tihdante :

   l) Buh chi hi chiah uingho sa nise, chu chu a kûina tur chikuang, nursery kan tih mai uluk taka siamah rual taka theh tur a ni. Chikuang chu rih pawn a, thingphel emaw dap emaw mau phel emaw a khuah tur. Buh chi theh hnuah lei dip leh di emaw buhpawl emaw a khuh tur a ni a, ni khat danah emaw fimkhur taka tui pek tur. Buh a lo tiahin a khuhna hi dahsawn leh tur.

   2) Hectare khat a phun turin buh chi kg 5 kûi ila a tawk. Chutiang anih chuan acre khata phun tur kg 2 kûi ila a tawk chiah. Nursery-te chu metre 1 a zau, a sei zawng erawh a remchan dan anga siam tur a ni. Lo a zau deuh chuan hmun hrang hranga siam a tha, a chi tiak thiar vel a awlsam zawk vangin.

   3) Buh tiakte chu ni 8 a upa anih atangin a phun sawn theih a, ni 15 a upa thleng hi duhthusam a ni. A ai chuan upa lo se a tha. Hetih hun hian buh tiakin hnah pahnih a nei ber. Thlai tiak dang phun pawhin a naupang pang phun a tha fo.

   4) Phun sawn dawn hian buh tiakte hi pawh chi a ni lova, fimkhur takin thir phek emaw cement mistiri hmanrua grandhi te hian lawk tur a ni. An la naupangin an la no em em a, kan hliam hauh tur a ni lo. Minute 15-30 chhungin kan phun fel vek tur a ni. Heng buh tiak lawk sa pawh hi khote, tray te in emaw keng ila a tha. Hetianga buh phun hian a nung nghal mai a, phun tirha a than chawl lailawk leh eng tiar tuar pawh a awm ve lem lo. Hetia buh tiak naupangte kan phun hian buhin than hun a neih rei phah a chu chu a pengin a lo pun phah bawk a, buh a lo thar tamin a thar hlawk phah a ni.

   5) Buh phun hian a tlar a ngil tur a ni a, a tlar a a bi inkar te pawh a inang thlap tur a ni. Square in an phun thin. Chumi awmzia chu a tlar kar pawh inches 10 emaw 12 emaw 15 emaw a ni anga, tlar 1 a a bi inhlat dan pawh inches 10 emaw 12 emaw 15 emaw a ni bawk tur tihna a ni. Bi khatah pakhat chauh zel phun tur a ni a, pahnih a lo awm palh a nih pawhin chu aiin a tam tur a nilo. A bi leh tlar khat dan hi a lei a that dan leh a buh pen duh danah a innghat bawk.

   6) Lei hi uluk taka leh tur a ni a. Lei pawh uluk tak leh chiar tha taka kawi tur a ni. A in level tha em em tur a ni bawk. Tin, phun laiin tui a tling tur a nilo.

   7) A tlar ngil tak leh a bi inkar inang leh ngil, rual taka kan tih theih nan hrui emaw hmawlh emaw, a hran a an siam marker an tihte hmang thei ila a tha hle.

   8) Phun hnu pawh hian tui pek mai chi pawh a ni lova, a lei leh a ram leh khaw awm dan a zirin ni 2-6 danah te tui tling lova, a lei tihnawng khawp chauhva pek tur a ni a, chutiang chuan kalpui zui tur. A leite pawh sin te te chuan khi sela a pawi lo, a khi nasa tur a nilo thung. A tulzum tan atanga a seng hma ni 15 vel thleng tui pante a chim tir tur a ni a, chutah sah kang zui tur. Duhthusam ah chuan chhun pachan lai emaw ni sat vanglaia tui pek loh hram tur a ni. Tui a mamawh tlem em avang hian Mizoram atan hian thil tih itawm tak a ni.

   9) SRI tihna hmun hi tui control theihna nise duhthusam a ni. Tui tam lutuk paihna drainage channel leilet sirah awm sela; tin, bial chhungah pawh metre 2-3 danah tui tlinna tur channel emaw furrow emaw siam a tha.

   10) Hetianga SRI dana buh chin hian hnim pawh a thang duang duh hle, mahse, phun atanga ni 10 vel atangin hnim hman lova hlo hi thlawh zel tur. Hlo tûr hi recommend chu a ni chiah lova, a hnim awm a zirin hman pawh a tha zawk thei. Tin, Rotary Weeder (hlo thlawhna) a awm a, a tangkai hle. Hei hian lei a let chiar a, hnim pawt phawiin leiah a hnim phum nghal bawk a, lei titha tura tihdan kawngkhat a ni nghal. Weeder a hlo thlawh dawnin a hma nikhatah tui lo pek hmasak phawt tur a ni.

   11) SRI dana buh chin hian a peng tam duh hle mai a, a zung a hriselin a sei bawk a, hei hi a hlawkna chhan chu a ni. Bi khat a buh tiak 1 lek phun si khan 60 te, 70 te leh 100 chuangte pawh a peng thei. Chuvangin phun khat hi a ngai a, rin ngam mai tur. A than chak avang leh a pen tam avang hian hlo thlawh pawh a hautak rei lo thung. A vui rau rauah pawh a zakzeh emaw vui puitling lo a awm ngai meuh lo.

   12) Buh kung a tha a, a peng tam a, a rah a that bawk avangin chaw a ei nasa in lei a da duh hle tura ngaih tur. Chuvangin leithain kan chawm uluk hle tur a ni. Leitha pek tur zatve hi Organic leitha nise a zatve dang erawh chu chemical fertilizer hmanga pek tur a ni thung.

   Sawi tawh angin SRI danglamna chu buh chin dan pangngai aia buh a thar hlawk em em mai hi a ni a. Kum 2004-05 leh 2005-06 a Mizoram leilet a kan buh thar hlawk dan chu hectare khatah a hum in 26.80 qtl leh 27.30 qtl a ni a, a buhfai erawh chuan 18.70 qtl leh 19.1 qtl a ni thung. Hetih hun chhung vêka All India a buh thar dan chu 19.80 leh 21.00 qtl a ni thung. Hetih lai hian SRI tih dana buh chin erawh chuan a hum a ni emaw a fai a ni emaw a hmun ngaiah a thar hlawk bik em em a, a let li (4) let nga (5) in a thar hlawk zawk a, hei hi Zoram chhunga Agriculture Department in a enchhinnaah pawh chiang taka hmuh a ni.

   Agronomy Section, Directorate of Agriculture in 2009 kharif a demonstration (experiment) a neih result leh kum kalta kum 5 chhunga Mizoram a leilet leh thingtlang lova buh kan thar dan a hum leh a fai a chhut chhuah chu a hnung table ah tih lan a ni. A tawp berah chuan mihring kan pung zel a, kan eitur mamawh pawh a pung zel a. Chaw kan nghei theilo. Chaw atana kan ngaih chu buh chauh a ni hrih bawk si a, chuvangin buh chin uar leh thar hlawk hi a tul em em a ni. Thlai chin hi a hlawk hranpa lo a ni mai thei, mahse, kan mamawh a kan nghei theih bawk si loh avangin kan uar zual zel tur a ni. Chuta tan chuan thlai chin leh thar hlawk dan pawh theihtawp chhuahin kan zir zel tur a ni. Chubakah kan lo leh thlai hmun te hi awl lovin kum tluanin thlai chin nan leh thar nan kan hmang tur a ni.